「權力遊戲前傳熱爆」
龍之家族第二季先導懶人包
文：華萊@美劇咁樣睇
HBO年度重頭作，《權力遊戲》（Game Of Thrones）前傳—金球獎最佳劇集《龍之家族》（House Of The Dragon），第二季定於6月17日上架，改編自George R.R. Martin大叔原著嘅前傳小說《The Princess and The Queen》，嚟到最精彩嘅第二季，講述被稱為「Dance Of The Dragon血龍狂舞」嘅龍族Targaryen血腥內鬥歷史正式展開，究竟上一季劇情埋下咗幾多伏線？今季又有乜嘢劇情值得大家期待？華萊一於為大家整理咗呢個先導懶人包！
《龍之家族》黑黨vs綠黨，各大家族關係一覽
睇《權力遊戲》系列必定要知道一啲基本家族關係，《龍之家族》就相對簡單啲，主角家族係擁有噴火飛龍戰鬥力嘅Targaryen，同埋佢嘅近親家族Velaryon，兩族人最鮮明嘅基因特徵就係一頭銀髮，為咗保持基因純正，好多時會近親結婚，所以女主角、王位繼承人雷妮拉坦格利安（Rhaenyra Targaryen）之前就同表哥蘭尼諾瓦列利安（Laenor Velaryon）結婚，蘭尼諾詐死離開政治旋渦之後，雷妮拉就同自己嘅叔叔戴蒙坦格利安（Daemon Targaryen）再緍。
圖片來源：HBO
王位繼承人雷妮拉坦格利安（Rhaenyra Targaryen）與叔叔戴蒙坦格利安（Daemon Targaryen）再緍
另一個主要家族，就係Hightower，呢個家族其中兩個人物就係引發今次Targaryen內鬥嘅關鍵，一個就係御前首相奧托海塔爾（Otto Hightower），佢一手將女兒阿莉森海塔爾（Alicent Hightower）帶入宮中，最後令阿莉森成為新任王后，更埋下佢為保兒子而爭位嘅野心。
圖片來源：HBO
阿莉森海塔爾（Alicent Hightower）成為新任王后，埋下了爭位野心的種子
由於雷妮拉慣常以紅黑色作為主要衣着顏色，因此佢嘅支持者被稱為黑黨，並以封地龍石島作為據點。而阿莉森則以綠色衣裙作為主色調，因而被稱為綠黨，並佔據住君臨城。
《龍之家族》第一季前情提要，千絲萬縷的恩怨情仇
上一季嘅《龍之家族》，講述身為王位繼承人嘅公主雷妮拉，遭到繼母阿莉森同埋御前侍衛舊情人克里斯頓科爾（Criston Cole）爵士嘅背叛，喺父王駕崩後聯手冊立阿莉森所生嘅長子伊耿坦格利安二世（Aegon II Targaryen）為王。不特止，雷妮拉嘅仔路斯里斯（Lucerys Velaryon）去風息堡（Storm’s End）遊說領主支持母后嘅時候，竟然遇上阿莉森嘅第二仔伊蒙德（Aemond Targaryen），仲俾對方騎嘅飛龍咬死，呢個奪權殺子之仇，雷妮拉今季就要報啦！
圖片來源：HBO
估計雷妮拉今季要報兒子路斯里斯（Lucerys Velaryon）被殺之仇
《龍之家族》第二季劇情發展估計
既然係關於復仇同埋重奪帝位，第二季重點當然係多場大戰以及要血債血償嘅陰謀權鬥啦！首集片名公布咗叫做《A Son for a Son》，睇嚟係雷妮拉要用阿莉森嘅仔嚟一命填一命。根據原著故事，估計首集會係同戴蒙派人潛入君臨城復仇有關。
兩方陣營要鞏固權力，同樣需要獲得七國嘅各大家族支持。從預告片中睇到，《權力遊戲》嘅主線家族臨冬城（Winterfell）嘅史塔克家族（House Stark）終於有出現，預料佢哋今季會有份參戰。
叫得做「龍之家族」，噴火飛龍就係最強戰力，黑黨方面由於由雷妮拉同姻親嘅Velaryon家族組成聯盟，所以擁有嘅飛龍最多，但係每條龍只認一個主人，真正擁有龍騎士能力嘅人並不多，因此今季劇情預計會講到Targaryen家族搵散落四周嘅私生子，從中挑選成為龍騎士，而呢班人亦會成為戰事中嘅重要變數！
圖片來源：HBO
「龍之家族」又點少得噴火飛龍的出現
血腥大屠殺事件再現？
由於「血龍狂舞」係一個長達數年嘅內鬥與戰龍血腥大屠殺事件，雙方都死傷慘重，多場戰役都會涉及飛龍噴火等情況，特技場面必定唔少得。估計今季劇情會好快進入高潮，好多外國劇迷分析，都預計涉及三龍大混戰嘅「鴉棲堡之戰」（Battle of Rook’s Rest），會喺今季上演，呢場大戰真係值得期待呀！仲有就係《權力遊戲》出晒名嘅突然殺死主角人物嘅劇情安排，喺今季嘅《龍之家族》都有可能會出現，大家小心又被嚇親。
圖片來源：HBO
今季嘅《龍之家族》都有可能會出現不少「驚嚇」場面
一定要睇哂《權力遊戲》先可以追《龍之家族》？
好多人都會問，係咪要睇晒八季嘅《權力遊戲》，先可以追《龍之家族》，大家可以放心，因為呢個前傳故事，係《權力遊戲》200年前嘅歷史，人物同故事都係全新，並無太大關連嘅，就算冇睇過《權力遊戲》都完全可以入坑，唔使怕要面對《權力遊戲》第八季PTSD啦！不過若然想要追返咁多季嘅《權力遊戲》同埋第一季嘅《龍之家族》，喺HBO GO自選點播就可以足本重溫！
>>> 按此到HBO GO自選服務立即點播《權力遊戲》第一季
>>> 按此到HBO GO自選服務立即點播《龍之家族》第一季
更多HBO原創劇心水推介
最近HBO幾個劇都唔錯，其中羅拔唐尼有份主演嘅越戰間諜迷你劇集《同情者》（The Sympathizer），佢一個人有超多造型，剛剛完咗季，都幾值得追下。另外就係贏過多屆金球同艾美獎喜劇組最佳女主角嘅《職業槍手》（Hacks）第三季都回歸咗，可以趁《龍之家族》未開播前，煲埋先！
圖片來源：HBO
The Sympathizer TM & © HBO ENTERPRISES. All Rights Reserved.
羅拔唐尼有份主演嘅越戰間諜迷你劇集《同情者》（The Sympathizer）
圖片來源：HBO
Hacks TM & © UNIVERSAL STUDIOS INC.. All Rights Reserved.
贏過多屆金球同艾美獎喜劇組最佳女主角嘅《職業槍手》（Hacks）第三季
>>> 按此到HBO GO自選服務立即點播《同情者》第一季
>>> 按此到HBO GO自選服務立即點播《職業槍手》第一季
更多文章：
【韓國電影推薦】一句點評必看 2023年度十大韓國票房電影
新一代美國隊長擔正 遊戲改編《Twisted Metal 烈火戰車》線上看
【Now True】《加密幣王的墜落》檢視薯條哥的起落人生
【奧斯卡2024】奧斯卡金像獎花絮及一文睇晒得獎名單
